Музейда “Тукай йолдызлыгы”на багышланган аерым зал бар. Экспозициянең түрендә залның күрке — “тылсымлы көзге” тора. Габдулла Тукайның кырык бер  замандашы музыкаль бизәлеш астында бер-бер артлы әлеге көзгедә чагылып китә: Фатих Әмирхан, Галиәсгар Камал, Камил Мотыйгый, Сәгыйть Рәмиев, Гафур Коләхметов, Сәхипҗамал Гыйззәтуллина-Волжская, Сәгыйть Сүнчәләй… Ә электрон җайланмада  милләтебезнең асыл затлары турында тулы мәгълумат тупланган. Аларның һәркайсы татар халкының тормышына, милләт язмышына, Тукайның шәхес һәм шагыйрь булып формалашуына, дөньяга карашына йогынты ясаган.

Ләкин һәркемнең дә музейга килеп экспозиция белән танышырга мөмкинчелеге юк, шунлыктан,  “Тукай йолдызлыгы” темасын да онлайн видеопроект рәвешендә тәкъдим итәргә булдык. Дәресләренең һәрберсе  аерым бер шәхескә багышлана. Видеоязмада Тукай даирәсеннән булган замандашның фотосы, аның белән бәйле экспонатлар, документлар, истәлекләр тәкъдим ителә.

Шагыйрь белән танышу, аралашу дәверендә булган кызыклы вакыйгалар бәян ителә. Замандашларның бер-берсенә мөнәсәбәте, бергә эшләгән һәм ял иткән урыннары, сөйләшкән сүзләре  аркылы шул заманның әдәби-мәдәни торышын, алдынгы карашлы яшьләрнең ничек яшәүләрен, нәрсә белән кызыксынуларын, гомумән, Тукай яшәгән мохитне күпмедер дәрәҗәдә күз алдына китерергә мөмкин. Бу проект атнага ике мәртәбә — сишәмбе һәм җомга көннәрендә чыга.

Социаль челтәрләрдә Г. Тукай әдәби музее түбәндәге адрес буенча урнашкан: vk.com/club84864973, Инстаграм: @muztukay.

 «Тукай йолдызлыгы» онлайн проектына рәхим итегез!